Еспресо.мк започна соработка со една посебна, прекрасна мајсторка во кујна – Мартина Трајаноска.
Шармантната Мартина стои зад превкусните рецепти пласирани на Инстаграм профилот (martinascookingg) .
Готви од мала, а со текот на годините и искуството научила дека најважна состојка во секое јадење е – љубовта.
Денес Мартина ни носи превкусен рецепт совршен за неделниов ден – Бурито со мелено месо, салата и печурки.
– Е ова е фантазија и топење во уста секое залаче!, вели Мартина и додава: мајонезот со вкус на краставица дава таков преубав и освежителен шмек и вкус, мммм….
Овој пат користев купечки тортиљи со што ептен се скратува времето на подготовка. Потребно е само да го запржите месото и при крај да ги додадете печурките.
Потоа само редите врз тортиљите, завиткувате и тоа е тоа!
За полесно и уште поубаво, кашкавалот и краставицата јас ги сечкам со лупалка за зеленчук и овошје.
Тортиљите ги запекувам кратко на едната страна, на средина од долниот дел ставам најпрво од месото, парчиња кашкавал, парчиња домат, мајонез со вкус на краставица, парчиња краставица и на крајот, завиткувам.
Најпрво преклопете ги двете страни(лева и десна), па виткајте одоздола нагоре и убаво притиснете. Послужете со помфрит или додатоци по желба.
Добар апетит!
