Ивана на својата професија ѝ даде хуманитарен карактер – да им помогне на дамите кои на било каков начин ги загубиле веѓите повторно да се чувствуваат убаво и да си ја вратат самодовербата.
Разговараме со козметичарката и шминкерка Ивана Атанасовска-Николовска од Скопје, жена со златни раце и срце, која бесплатно им црта веѓи на жените кои се на хемотерапија или боледувааат од алопеција.
Како се одлучи за ваков хуман гест?
– ПХИ Академијата каде што ја завршив обуката за јапонско цртање на веѓи воведе една акција „pay with smile“ или „плати со насмевка“, и веднаш се согласив да учествувам во тоа. Во тој период и мојата мајка заболе од канцер на гради, па точно знаев како им е на жените кои ја изгубиле косата при хемотерапија или алопеција (автоимуна болест, н.з).
Колку време веќе се трудиш да им даруваш насмевки на жените кои се борат со канцер или алопеција?
– Веќе 5 години го правам тоа. Сигурно ќе продолжам и понатаму сè додека некој има потреба од тоа.
Каква е реакцијата на жените после исцртувањето на веѓите, кога ќе се погледнат во огледало?
– Реакцијата и емоциите на жените не може да се опише со зборови, едноставно треба да се доживее и да бидете сведок на икрени солзи и топла прегратка од нив. Некои со солзи во очите ме гушкаат по завршениот третман и тоа ми го полни срцето. Тие се пресреќни, а пресреќна сум и јас.
Колку време работиш со класичното разубавување на жените?
– 15 години работам како шминкер и од пред неполни 6 години сум горд сопственик на козметички салон.
Каков третман е јапонското исцртување на веѓи?
– Микроблајдингот на веѓите е цртање на веѓи со помош на специјални, мали сечила – сечила со кои пигментот е плитко воведен под кожата во форма на влакна нацртани во насока на природен раст на веѓите. Пигментите што се користат во оваа прилика се безбедни и хипоалергични, а резултатите се сосема природни и се прилагодуваат на обликот, големината и густината на веѓите – со што се постигнува најприродниот изглед.
