На наше задоволство и, секако, со дозвола од неговата мајка, Александра, денес разговараме со ученикот Јованче Трајков – страсен љубибител и колекционер на цвеќиња.
Да, добро прочитавте – Јованче е млад човек, а веќе искусен во негата на цвеќиња, зашто со нив се занимава од петгодишна возраст.
– Цвеќињата ме прават многу среќен, за нив нема цена за која би можел да ги дадам или да ги продадам! – ни вели малиот господин.
Јованче е одговорен за дворот, верувале или не. Тоа го потврдува и неговата мајка, која му дава бескрајна поддршка.
– Ми помагаат и моите родители за некои потешки работи околу дворот- искрен е Јованче и додава – се уште не е завршен со уредување нашиот двор, се уште се реновира и декорира, но се надевам дека до летотоќе биде уште поубав.
Дворот на Јованче е прилично голем, а се наоѓа во Свети Николе. Во дворот доминираат орхидеите, а Јованче меѓу цвеќињата е најмалку три до четири часа секојдневно.
– Орхидејата ми е омилено цвеќе, но и палмите со својот раскош. Навистина ме прават среќен! – вели Јованче.
Во зима сите цвеќиња се грижени и заштитени, внатре, во соба или во подрум, во топли простории богати со светлина.
Сакате совет од ова младо момченце за почетници во нега на цвеќиња?
– Оние кои сакаат да почнат со нега на цвеќе, треба тоа да го направат со надворешни цвеќиња како што се петуниите, сарделите, шеќерчињата, цунцулите и други разни убавици – смета Јованче.
Инаку, Јованче е член на Фејсбук групата …ДВОРЧЕТО…, група која ви ја препорачуваме да си станете член и да се изнагледате преубави објави!
УЖИВАЈТЕ ВО ФОТОГАЛЕРИЈАТА:
