Даниела Ичковска моментно е невработена, мајка е на три деца, од кои едното е година ипол и си бара многу внимание и грижа. Цвеќињата ги засакала уште од мала, го уредувала дворот кај мајка ѝ и татко ѝ, а денес живее во Долно Лисиче кадешто, исто така, има голем двор пред куќата со голем, чист тревник и зимзелени дрвца.
Просторот зад куќата пак, е зелена градинарска „работилница“ во која Даниела експериментира нови работи.
Преку целата година домот го красат собните растенија, од бенџамин, сефлера, спатифилиум, аглоанема, палма до божиќна ѕвезда.
– Овие цвеќиња за мене се едноставни за одгледување, бараат вода еднаш неделно, поставени се на силна светлина, а се пресадуваат еднаш годишно, на пролет. Ги прихранувам просечно на две недели – ни открива Даниела.
Вели дека во текот на летото повеќе време поминува со цвеќињата додека во зима грижата е поедноставна.
– Цвеќето си бара грижа и внимание, но токму поради тоа и возвраќа со љубов – додава таа, не криејќи дека многу се радува на секое ново никнато ливче или цвет.
Даниела ни открива и дека иако, се вели, дека кактусите се лесни за одгледување, неа лично ѝ се слаба точка.
– Не ми успеваат – искрена е таа – најверојатно им ставам повеќе вода отколку што треба.
Инаку, Даниела е членка на Фејсбук групата …ДВОРЧЕТО…, група која ви ја препорачуваме да си станете член и да се изнагледате преубави објави!
УЖИВАЈТЕ ВО ФОТОГАЛЕРИЈАТА.
ФОТО – ПРИВАТНА АРХИВА
