Кога влегувате во дворот на Велика Зуламоска во Кривогаштани, имате чувство дека сте во рај, цветен рај, кој ви нуди и топлина, и љубов, и можете со часови да уживате во убавите глетки. Ако минете покрај куќата; Величе веднаш ќе ви посака топло добредојде и многу веројатно ќе ви подари хризантема.
Велика живее во Кривогаштани, таа е горда мајка која покрај трите ќерки никогаш не е ни сама ни осамена.
Ако поминете покрај нејзината куќа ќе помислите дека за дворот се грижат неколкумина млади луѓе, но не е така. За дворот да изгледа ваков, прекрасен, се грижи сама 73 годишната жена. Откако е во пензија таа целото свое време го посветува на куќата и на оваа убавина.
– Почнувам од сабајле и нема крај на работата во дворот, ни признава нашата цветна дама. Со часови останувам со цвеќињата и со љубов се грижам за секое од нив.
Велика има умни зборови за нас: ,,Домаќинот по дворот се познава’’, вели.
Дворот изобилува со безброј различни цвеќиња и сите се естетски наредени, по боја и според типот на цвеќето. А, тука се и саксиите кои дополнително го красат просторот, со најразновидно цвеќе.
– Не мора да е цвеќето скапо, секое цвеќе ќе биде убаво ако е добро одгледувано. Хранлива земја, навремено полевање и убаво топло сонце е сè што му треба на секое растение – Величе ни раскажува со широка насмевка.
Сардели, трендафили, петунии, хризантеми го красат нејзиниот двор. За зимскиот период пак, има посебна просторија каде ги заштитува саксиските цвеќиња, а останатите дворски цвеќиња ако не успеат да ја преживеат студената зима ќе бидат заменети со нови.
– Особено ги обожавам хризантемите бидеќи може да ги размножувам во голем број и да ги подарувам на тие што немаат…, ни рече добродушната женичка.
Овие написи може да ги следите и во групата … ДВОРЧЕТО …, група во која има едно чудо разноразни убавини, и која ви ја препорачуваме да ја посетите и да си станете нејзин член!
УЖИВАЈТЕ ВО ФОТОГАЛЕРИЈАТА.
ФОТО – ПРИВАТНА АРХИВА
