Со коронавирус, во изминатите седум дена во светот, се заразиле над четири милиони лица, што е највисока бројка за една недела од почетокот на пандемијата, соопшти Светската здравствена организација (СЗО).
Од СЗО предупредуваат дека само во последната недела се пријавени точно 4.060.891 лица со ковид-19 и оти во истиот период починале 67.221 пациент, пренесе агенцијата ТАСС. Една недела претходно, беа потврдени 3.977.223 новозаболени лица и 59.699 смртни случаи.
СЗО, меѓутоа, верува дека податоците за претходната недела укажуваат на забавување на ширењето на пандемијата.
Организацијата забележува дека тренд на опаѓање на бројот на нови инфекции е забележан во Европа и во Југоисточна Азија, додека ширењето на вирусот е зголемено во Северна и во Јужна Америка, со зголемување на бројот на смртни случаи од ковид-19.
Во периодот од 16 до 22 ноември, најголемо зголемување на бројот на нови случаи е потврдено во Европа – околу 1,7 милиони пациенти, со над 32.600 смртни случаи. Северна и Јужна Америка, во тој период, регистрирале над 1,6 милиони нови случаи на ковид-19 и речиси 22.000 починати додека во Југоисточна Азија, во изминатите седум дена, се заразени 351.000 луѓе, а бројот на смртни случаи е зголемен за 4.700.
