Големата здравствена криза предизвикана од појавата и ширењето на коронавирусот се чини дека ги окупираше сите здравствени ресурси со кои располага земјава, па пациентите со други заболувања паѓаат во втор план и имаат поголеми или помали проблеми при остварување на своите здравствени права. Подолго време целосно се затворени сите стоматолошки ординации, но и другите приватни специјалистички ординации речиси и да не работат. Иако тоа се прави за да се спречи ширење на инфекцијата, сепак ваквиот начин на функционирање ги тера пациентите да одат повторно во големите болници и клиничкиот центар каде поради големата концентрација на болни и најголеми се шансите за ширење на заразата.
Моето дете кое има 8 години и се жали на забот подолго време, вели една мајка.
– Пред неколку недели кога се уште работеа матичните стоматолози му го отворија забот и му ставија лек. После ги затворија ординациите и сега велат носи го на Клиника за стоматологија. Но зошто да одиме таму каде што се поголеми шансите за да добиеме коронавирус – прашува една мајка.
Четириесет и двегодишен Скопјанец во изјава за Слободен печат вели дека минатиот викенд добил инфекција на очите и се соочил со проблем да нема каде да оди на лекар.
– Прво мислев да одам во приватните ординации зошто таму има помалку гужва, но ниту една не работеше во сабота. Се консултиравме со матичната лекарка и таа не упати на Очна клиника во Клиничкиот центар. Како да одам таму после случајот со Клиниката за кожни болести која е сместена во иста зграда со Очната клиника – прашува нашиот соговорник.
Во еден друг случај, ќерката го однела својот возрасен татко во болницата „8 Септември“, но таму веднаш и рекле: „сакаш ли да добие коронавирус?“. Човекот бил пациент на дијализа и во многу лоша состојба, поради што и го примиле на лекување, но за жал починал после половина час.
Некои пациенти намерно не одат на лекар исплашени од тоа да не добијат ковид-19 и со тоа го изложуваат на ризик сопственото здравје.
Од Министерството за здравство секојдневно испраќаат препораки за тоа како да постапуваат пациентите кои имаат хронични болести. Последно е она за пациентите на дијализа кои доколку добијат симптоми на коронавирус треба да се обратат на Клиниката за нефрологија. Од МЗ велат дека пациентите со сида, хепатит и други хронични инфективни болести и понатаму ја добиваат потребната здравствена услуга на Клиниката за инфективни болести.
The post „Обичните“ пациенти пред пеколна дилема: Да добиеш коронавирус или да умреш од нешто друго? appeared first on Слободен печат.
