Лидерот на Левица Димитер Апасиев преку фејсбук-објава бара извинување од претседателот на Собраниската Комисија за прашања на изборите и именувањето од редовите на СДСМ, Костадин Костадинов, а доколку тоа не се случи во рок од 48 часа, најавува пријава за тужба против него.
Причината, како што пишува Апасиев, е објава на социјалните мрежи од страна на Костадинов со „лажна информација“ дека „Апасиев добил стан од ВМРО-ДПМНЕ“.
„Денес, од портпаролот на СДС на Нашата Земја – Костадин Костадинов, кој е и мој колега во Собранието на РМ, побарав повлекување на клеветничката изјава дека наводно ВМРО-ДПМНЕ ми го купил станот.
p.s. Коки, имаш 48 часа да се извиниш, друже – во спротивно тврдењето ќе треба да го докажеш пред суд.“, пишува Апасиев прикачувајќи документ со барање за јавно извинување и повлекување клеветничка изјава.
„Почитуван колега Костадинов,
На ден 2 декември 2020 година (среда), на Вашиот официјален ЕБ профил, т.е. Фејсбук фан-пејџ сте објавиле клеветнички статус против мене, во кој – меѓудругото – дословно велите:
– Додека тој (Апасиев) троши државни пари, додека ВМРО-ДПМНЕ како што можевме да прочитаме, му купува станови, додека земал хонорари од СЈО, вие чекате тој да направи нешто согласно неговите можности како пратеник во Парламентот, за да ги подобри условите за живот на сите.
Жалам што, на ваков начин, морам да Ве потсетам дека, како автор на оваа
малициозна и клеветничка јавна изјава сте навеле ноторно невистинито тврдење
за потеклото на мојата имотна состојба, со намера мое свесно и злонамерно
дискредитирање во очите на јавноста.
Бидејќи Вие, како лице експонирано во јавноста (портпарол на владејачката партија СДС и пратеник во Собранието на РМ), преку личен пример, треба да внимавате на Вашето однесување – а во духот на градење идни стандарди и добри практики на аргументирана и цивилизирана демократска дебата ослободена од лаги, спинувања и тенденциозни манипулации – БАРАМ од Вас, во законски
предвидениот рок од 48 часа, јавно да се извините за изнесената намерна клевета против мене и истата да ја повлечете од етерот, на начин предвиден со Законот, пишува во документот што го објави Апасиев.
На ова, Костадинов кратко му реплицираше преку објава на неговиот твитер-профил:
„Денес, после барањето од колегата Димче Апасиев да му се извинам, сакам да му препорачам малку да излезе на воздух и да се прошета. пс.Димче нема да биде лошо да почнеш да доаѓаш на работа во Парламент, за што всушност земаш плата.“
