Политиката на Бугарија кон Северна Македонија нема никаков успех, а преименувањето на 24 мај е катастрофална постапка, изјави Пламена Зајачка, член на раководството на бугарската партија АБВ на поранешниот претседател Георги Прванов.
Таа дополни дека од регионален лидер, Бугарија станала изолирана земја, истакнувајќи дека со стопирање на пристапните преговори на Македонија во ЕУ, се кочи и Албанија. „Ние ги уништуваме односите со две соседни земји на Балканот – ако ова не е неуспех, како поинаку може да се квалификува“, вели Зајачка.
– Ги нарушивме односите со Северна Македонија, а го осудивме на неуспех и приоритетот од претседателството на Бугарија со Советот на ЕУ. Приоритет беше интеграцијата на Западен Балкан. Две години подоцна, никаде не се споменува оваа интеграција. Неуспешна политика, изјави Зајачка.
Според неа одлуката на парламентот за преименување на 24 мај е трагична и е неприфатливо што „институцијата со најмала доверба во јавноста“ ја преименува историјата, посочувајќи дека со преименувањето на 24-ти мај, се дава директна основа во Северна Македонија празникот да се одбележува како Ден на македонската писменост.
– Ова е политичка одлука, која од една страна покажува дека Патриотите (н.з. коалиција предводена од ВМРО-БНД) сакаат Македонија да не влезе во ЕУ за да можат да продолжат да ги продаваат пасошите за европско државјанство преку Бугарија, а од друга страна со ова цврсто тропање на масата се цели да го зацврстат нивниот електорат, заклучува Зајачка.
