Сите жени во Македонија од 45 години до 69 години ќе добијат покана да направат мамографија и ехо. Целта на скринигот за рак на дојка кој почна по две години пауза поради пандемијата со коронавирусот е навреме во рана фаза да се детектира болеста.
Од оваа година кај жените каде ќе има наод самиот радиолог ќе закаже кај онколог и торакален хируруг со цел да се намали патот до лекувњето.
Исто така и жените помлади од 45 години кои имаат во семејството рак на дојка може да се пријават на skrinig.zdravstvo.gov.mk или да се јават на 080015444 од 13 до 15 часот секој ден.
Мамографијата се извршува во повеќе здравствени центри во земјава. Постапката не трае повеќе од десетина минути, се извршува на современ апарат, а претходно медицинските лица прават визуелен преглед на дојките на жената.
За да ја направите мамографијата од Министерството за здравство добивате СМС порака во која ве известуваат за терминот и местото каде имате закажан преглед. Доколку сакате да го откажете прегледот, тоа може да го направите секој работен ден до 15 часот.
„Не ги игнорирајте пораките на мобилниот телефон со покана за преглед на мамографија“, вели докторката од Клиниката за радиологија Светлана Темелковска.
За да го остварите вашето право на преглед, без разлика во која здравствена установа ви е терминот, не треба да се појавувате на шалтер, затоа што прегледот е автоматски закажан. По завршување на прегледот ви кажуваат дека резултатите ќе ви стигнат на вашата меил адреса, а доколку има потреба ќе ви се јават за дополнителен термин за преглед.
„Ракот на дојка е најчесто малигно заболување кај жените и месец октомври е посветен токму на борбата против ракот на дојка, неговата превенција и рано детектирање“, велат во Министерството.
Овој скрининг е посебно значаен за жените кога имаат знаци за промени на дојката или треба да направат контрола. Жената треба да стигне на преглед навремено за да се открие во рана фаза, информираат од Министерството за здравство.
Скрининг мамографијата е бесплатна за жените во програмата, партиципацијата ја покрива Министерството за здравство.
