Пејачот Виктор Апостоловски стана татко. Со објава на својот инстаграм-профил, тој вчера ја сподели среќната вест дека неговата сопруга Милена се породила и на свет донела машко дете.
Во видеото кое го сними од болница, Апостоловски откри дека синчето го добило името Адам, истакнувајќи дека во семејството „стигнал првиот маж“. Неговата искрена радост и возбуда веднаш предизвикаа бројни честитки од колеги и следбеници.
Пејачот и Милена, кои се во брак од 2023 година, многу внимателно ја чуваа бременоста подалеку од јавноста и официјално ја потврдија веста само неколку недели пред породувањето. Виктор тогаш раскажа дека Милена се чувствува одлично и дека двајцата со нетрпение го очекуваат моментот да станат родители.
Нивната љубовна приказна започна сосема спонтано – се запознале во маркет во Битола, а подоцна откриле дека уште како дете Милена била негов фан и чувала плакат од него.
Апостоловски, кој на публиката ѝ е познат уште од учеството во музичкото реално шоу „Македонски идол“ и по хитот „Супермен“ на националниот Избор за песна на Евровизија, сега ја започнува улогата на татко – најубавото поглавје, како што вели самиот тој.
