Протестите по смртта на 22-годишната Махса Амини се проширија низ Иран како шумски пожар, а поддршката на луѓето доаѓа и од различни делови на светот. Сега кон сето тоа се приклучи и познатата турска пејачка Мелек Мосо.
Мосо си отсече прамени од косата за време на нејзиниот настап за да изрази солидарност со жените од Иран. Нејзиното видео набрзо се прошири на интернет и доби многу пофални зборови.
На видеото кое кружи на социјалните мрежи може да се види како Мосо, облечена во свечена бела облека со детали од тантела, со ножици си отсекува дел од косата, додека во позадина се слуша како публиката ја бодри.
Самата Мосо го сподели видеото на својот инстаграм-профил и напиша:
„Ако сакате да не кубете за коса и да не вовлечете во вашата темнина, ние ќе ја скратиме таа коса. Слободата треба да биде еднаква за сите во светот. Право на сите жени е да живеат хумано во овој свет. Различни ограничувања и прогонства на моите сестри, каде било во светот, ми го кршат срцето“, напиша Мосо.
Пејачката додаде дека до крај ќе стои покрај иранскиот народ и жените кои таму се борат за својата слобода.
Инаку, Мосо отсекогаш важеше за „гласен“ поборник за правата на жените. Во 2020 година, пејачката беше симната од сцената затоа што го критикуваше ослободувањето на полицаецот силувач во Турција.
На еден од концертите таа кажа: „Ако сакате да бидете отворени, отворете се. Ако сакате да зборувате, пуште глас. Не треба никој да ви кажува како да се однесувате, што да правите, како да се облекувате, девојки. Вие имате свои крилја. Не мора да бидете под ничија закрила. Летајте“.
Мосо важи за многу популарна пејачка во Турција, а позната е по бројните хитови кои често може да се слушнат во турските серии што се прикажуваат кај нас.
View this post on Instagram
