Песната „Ту ноч кад си се удавала“ на „Прљаво казалиште“ за многумина е една од најубавите балади, а со нејзиното настанување се поврзува многу тажна приказна.
Оваа песна често се наоѓа на репертоарот на оние со скршени срца. Но, колку и да им изгледа нивната љубовна приказна трагична во тој момент, тешко дека може да ја надмине онаа за која се зборува дека стои зад познатите стихови.
Според легендата што со години се прераскажува, Јасенко Хоура, фронтменот на „Прљаво казалиште“, имал девојка во која бил многу вљубен. Кога заминувал во војска, ја прашал дали ќе го чека, а таа му ветила дека ќе го направи тоа.
Кога се вратил, со бендот договорил настап на една свадба, за подоцна да дознае дека станува збор токму за свадбата на неговата девојка.
Слична приказна се поврзува и со песната „Свирајте ми јесен стиже дуњо моја“ на Ѓорѓе Балашевиќ.
Балашевиќ исто така бил вљубен во девојка од соседството кога заминал во војска. Кога се вратил од војска, го пречекала мајка му, која му кажала дека мора да оди на свадба кај соседите.
Погодувате – станувало збор за свадбата на девојката што ја сакал.
