Српската пејачка Тања Савиќ откри дека во последно време се соочува со здравствени проблеми поради кои ѝ опаѓа косата, но и дека има проблеми со гласот поради полип на гласните жици.
Пејачката ова лето го поминува работно, со бројни настапи низ регионот, а најмногу време минува во Црна Гора. Пред еден од концертите во Будва, во разговор со водителот Божо Добриша, таа зборувала за своето здравје, но и за приватниот живот, новите песни и работите што би ги променила во минатото.
Тања открила дека една од причините за опаѓањето на косата е намаленото ниво на железо.
„Имам недостиг на железо. Железото ми е седум, премногу стрес, а сè уште не можам да примам инфузија со железо бидејќи резервите на железо ми се во ред, но главното железо ми е намалено“, рекла пејачката.
Водителот ѝ забележал дека барем гласот добро ја служи, но Тања признала дека и таму има одредени тешкотии.
„Не е ни тој баш онаков каков што би сакала да биде. Имам полип на гласните жици што го заработив пред пет години, кога беше короната, но нема врска, се снаоѓам“, открила таа.
Пред интервјуто, пејачката се сретнала со човек кој ѝ покажал фотографии од периодот кога имала голема турнеја со финалистите од првата сезона на „Ѕвездите на Гранд“, шоуто од кое и самата потекнува.
Гледајќи ги старите фотографии, Тања се присетила на младоста и открила дека денес поинаку гледа на многу работи.
„Сега ги видов фотографиите, значи… Тие се од пред 22 години, тогаш имав 18 години. Многу научив од тој период и многу би сакала денес да можам да ги имам тие години, а оваа памет“, рекла пејачката.
Таа признала дека во минатото многу им верувала на луѓето и дека токму тоа често ѝ создавало проблеми.
„Многу им верував на луѓето и тука грешев. Одев секаде со срце и затоа така поминував. Човек цел живот мора да работи на себе, не знам до кога повеќе. Денес сум малку повнимателна“, додала Тања.
