Хронична опструктивна белодробна болест (ХОББ) е група белодробни заболувања што го отежнуваат дишењето и се влошува со текот на времето. Постојат два главни типа: емфизем (ги зафаќа пулмоналните алвеоли, како и ѕидовите меѓу нив) – кај овој тип тие се оштетени и помалку еластични); и хроничен бронхитис (слузницата на дишните патишта е постојано иритирана и воспалена, што доведува до појава на оток и слуз).
Кои се симптомите на ХОББ?
Симптомите може да изостануваат на почетокот или може да бидат само благи. Како што болеста се влошува, нејзините симптоми обично стануваат потешки. Тие може да вклучуваат: честа кашлица или кашлица што произведува многу слуз; отежнато дишење; звук на кркорење или свирење кога дишете; недостиг на здив, особено ако сте физички активни; чувство на притисок во градите.
Како се дијагностицира ХОББ?
За да се постави дијагноза, вашиот доктор може да се послужи со: вашата медицинска историја вклучувајќи прашања за вашите симптоми; вашата семејна историја; различни лабораториски тестови, какви што се тестови за белодробна функција, рендген на граден кош или КТ-скен и крвна слика.
Како се третира ХОББ?
ХОББ не исчезнува, но постојат третмани што може да ги ублажат симптомите, да го забават напредокот на болеста и да ја подобрат вашата способност да останете активни. Исто така, постојат третмани за спречување или лекување компликации од болеста. Третманите вклучуваат:
– Промени во животниот стил
Ако сте пушач, да се откажете од пушењето е најважното нешто што можете да го направите за ублажување на ХОББ; избегнувајте пасивно пушење и места каде што може да вдишете други надразнувачи на белите дробови; побарајте од вашиот лекар план за оброци што ги задоволува вашите нутритивни потреби; прашајте и колку физичка активност можете да правите. Физичката активност може да ги зајакне мускулите што ви помагаат да дишете и да ја подобрите вашата целокупна благосостојба.
– Лекови
Бронходилататори: тие служат за опуштање на мускулите околу дишните патишта. Ова им помага да се отворат и го олеснува дишењето. Повеќето бронходилататори се примаат преку инхалација. Во потешки случаи, инхалаторот може да содржи и кортикостероиди за да се намали воспалението; вакцини против грип и пневмококна пневмонија (Streptococcus pneumoniae): лицата со ХОББ се изложени на поголем ризик од сериозни проблеми од овие болести; антибиотици ако имате бактериска или вирусна инфекција на белите дробови.
– Терапија со кислород
Се користи ако имате тешка ХОББ и ниски нивоа на кислород во крвта. Терапијата со кислород може да ви помогне да дишете подобро. Можеби ќе ви треба дополнителен кислород постојано или само во одредени периоди.
Третманот на пациентите со ХОББ е комплексен и во нивното лекување треба да бидат инволвирани специјалисти (пулмолог, физиотерапевт и нутриционист), кои директно треба да соработуваат во индивидуалниот третман на пациентот. Само соодветната комбинација од третмани и совети од различните специјалисти може да влијае врз успешноста на лекувањето на пациентите со ХОББ.
Лекарите во Клиничката болница „Жан Митрев“ ви стојат на располагање за сите потребни прегледи, консултации и совети. Закажете термин на 02 3091 484
