Сопругата на францускиот претседател Емануел Макрон, Брижит во интервју за „Le Monde“ кажа дека е шокирана од негативните коментари за нивниот брак.
68-годишната Брижит Макрон вели дека одамна била свесна дека нивниот брак не е типичен, но дека не може да верува дека постои толкава агресија кон нив.
„Французите, се разбира, би биле посочувствителни кон помлада прва дама. Свесна сум дека не сме типична двојка, меѓу нас има разлика од 24 години и разбирам дека ова може да ги изненади луѓето и дека тие можеби не нè разбираат. Но, од друга страна, не можам да сфатам зошто постои толкава агресија“, рече Брижит.
Често ја споредуваат со Мариа Антоанет, велејќи дека живее луксузен живот и не е во контакт со „обичните смртници“.
„Навистина не знам што од моето однесување довело до такви споредби“, вели првата дама на Франција.
Не очекувала дека Емануел ќе стане политичар
Брижит откри дека не ни сонувала дека Емануел ќе стане политичар.
„Бев уверена дека Емануел ќе работи нешто поврзано со култура и се подготвував за таков живот“, вели таа.
Но, наместо тоа, тој стана министер за финансии во владата на Франсоа Оланд, а потоа во 2017 година стана претседател на Франција.
Макрон се подготвува за нова претседателска кампања, а неговата сопруга, која пораснала во буржоаско семејство и учела во приватно католичко училиште во Амиен, на северот на Франција, многумина ја сметаат за предност за придобивање на десничарските гласачи.
„Луѓето ме класифицираат како десничар само поради моето потекло и образование. Но, никој не ја знае мојата вистина“, вели Брижит.
Двојката се запознала додека Брижит била учителка во приватното училиште каде Емануел бил ученик. Поради него го оставила првиот сопруг со кој има три деца, а во 2007 година се омажила за Макрон.
