Познатиот глумец Раде Шербеџија е роден на денешен ден пред 80 години. Во текот на долгогодишната кариера соработувал со многу славни личности и честопати е расположен да споделува со јавноста интересни анегдоти и случки.
Во една прилика Шербеџија раскажа дека Шарлиз Терон била воодушевена од неговото јагнешко. Со Терон започнал да се дружи кон крајот на деведесеттите, кога заедно го снимале филмот „Mighty Joe Young“.
„Доаѓаше кај нас дома. Тогаш бев специјализиран за печење јагнешко на ражен во мојот двор. Имавме голем двор и голема куќа, понекогаш на мојата забава знаеја да дојдат и по сто луѓе. Доаѓаа и луѓе со кои работев на филмови, големи ѕвезди. Таа го обожаваше моето јагнешко, тоа е вистина. Навистина добро го подготвував, тоа го научив од мојот дедо Вујадин во Лика“, раскажа Раде во емисијата „Кај нас дома“.
Додека живеел во Холивуд, јагнешкото го набавувал од Нов Зеланд и вели дека било многу квалитетно.
„Треба да знаеш како да го направиш огнот. Јас секогаш сам го вртам раженот, не со електроника“, рекол Раде, кој денес повеќе не јаде јагнешко, бидејќи, како што вели, има премногу холестерол.
Средбата со Ал Пачино не поминала најдобро
Шербеџија соработувал со многу холивудски ѕвезди, а Ал Пачино го запознал на доделување награди во Венеција. Се присетил и на една анегдота со него.
Еден ден во 1997 година Раде сурфал, но еден бран го превртел и тој удрил со главата во дното.
„Тоа беше страшен удар, едвај испливав, но воопшто не можев да ја кренам десната рака. Итно ме однесоа во болница и, кога ги завршив сите прегледи и излегов да ги чекам резултатите, влезе Ал Пачино со двајца луѓе. Седев околу половина час.
Откако ги добив резултатите, тргнав кон излезот, но и Пачино исто така излезе. Буквално се погледнавме лице в лице, а јас будала му велам: „Ме паметиш ли?“, а тој ми одговори: „Не“. Наместо само да кажам „добро“, јас почнав да го потсетувам дека пред две години заедно добивме награди во Венеција…
Тој ја доби наградата за животно дело, а јас ја добив наградата за најдобар актер на фестивалот. И мојот филм тогаш ја освои Венеција. По доделувањето заедно пиевме, се шегувавме и разговаравме. Јас му го кажувам тоа, а тој ми се доближи до лицето и ми вели: „Па што?“ Јас си мислам: Зошто воопшто го прашав?“, раскажа Раде.
