Нашиот тим започна соработка со една посебна, прекрасна мајсторка во кујна – Мартина Трајаноска.
Шармантната Мартина стои зад превкусните рецепти пласирани на инстаграм-профилот (martinascooking).
Готви од мали нозе, а со текот на годините и искуството научила дека најважна состојка во секое јадење е – љубовта. Денес Мартина ни направи интегрално лепче со семки.
„Ако до сега сте се прашувале за најубавиот рецепт за интегрално лепче, ова е тоа што ви треба. неодамна го открив и не би го заменила за ниеден! Колку и да ви го фалам лепчето, мора сами да си го пробате. Всушност рецептот е многу едноставен и многу брз, направете си го со мнооогу љубов и уживајте во секое залче“, вели нашата драга Мартина.
Потребни состојки:
- 500 мл млака вода
- 750 гр интегрално брашно
- 15 гр сув квасец
- 2 лажици маслиново масло
- 1 лажица мед
- 1 лажица сол
- 50-70 гр сончоглед
- 50-70 гр сусам
- 50-70 гр ленено семе
- 50-70 гр семки од тиква
View this post on Instagram
Подготовка:
Најпрво измешајте ги брашното и сувиот квасец. Додадете ги и солта, медот и маслиновото масло, измешајте ги и семките, па додадете ја водата. Јас најпрво мешам со дрвена лажица дури малце не се соедини смесата, па тестото го префрлам на набрашнета површина. Измесете го убаво некои 5-10 минути дури не добиете убаво меко мазно тесто (без грутки). Вака тестото оставете го во сад покриен со кеса и крпа околу 1 час на топло. Јас го делам на 2 дела и печам 2 лепчиња.
Вие можете како едно поголемо лепче или неколку помали. Префрлете ги на хартија за печење и печете ги во загреана рерна на 180 С околу 40-тина минути. Извадете од рерна, попрскајте со вода и ставете ги на решетка или на плехчето и покријте ги со крпа. Оставете целосно да изладат, па може да уживате во овие убавини.
Доста заситува и едно средна големина парче отприлика би имало околу 100-150 калории. Замрзнете си го и вадете си по потреба. Нема да сакате да купите леб уште еднаш.
