Откако поп-дивата Јелена Карлеуша од Дубаи ја контактирала српската полиција и го пријавила својот поранешен сопруг Душко Тошиќ за наводен упад во стан на Дедиње, сега следи и неговото прво јавно огласување.
Како што беше објавено, Карлеуша пријавила дека Тошиќ без нејзино знаење и без претходен договор ги сменил бравите на влезната врата од станот, поради што побарала итна интервенција од надлежните институции.
Редакцијата побара изјава и од другата страна. Душко Тошиќ кусо и јасно одговорил, без да навлегува во детали и без желба за понатамошен коментар.
„Не знам што ме прашувате? Јас сум во својот стан“, изјавил Тошиќ, по што повеќе не одговарал на телефонски повици и пораки.
Според достапните информации, станот за кој станува збор формално се води на името на децата, а Јелена Карлеуша е нивен законски старател.
Карлеуша и претходно јавно истакнуваше дека по разводот нема комуникација со Тошиќ, иако, како што нагласува, нивните ќерки имаат нормален и коректен однос со таткото.
Пејачката во повеќе наврати тврдеше и дека Тошиќ не плаќа алиментација за ќерките Атина и Ника, но изрази уверување дека проблемот ќе биде решен по институционален пат, согласно важечките законски решенија.
