Еден од клучните помошници на принцот Хари и Меган Маркл дала отказ неколку дена пред премиерата на нивната документарна серија, пренесува Дејли меил.
Мандана Дајани (40) се повлече од функцијата претседател на фондацијата Арчевел на војводите од Сасекс по година и пол управување. Според новинарите, Дајани важела за една од најважните советници на Меган Маркл и принцот Хари, бидејќи имала одлични врски во американските медиуми.
Нејзиното неочекувано повлекување доаѓа три дена откако на интернет беше објавен трејлерот за документарната серија „Хари и Меган“, чии први епизоди ќе бидат прикажани на платформата Нетфликс на 8 декември 2022 година.
„Мандана Дајани беше составен дел од Арчевел и ние сме благодарни за нејзината страст за нејзината работа. Нема да има замена за нејзината позиција бидејќи војводата и војвотката сега целосно ќе ја преземат нивната компанија. Тие се разделија во пријателски односи и г-ѓа Дајани ќе продолжи да ги поддржува Меган и Хари во сите нивни напори“, рече во изјавата Ешли Хансен, портпаролка на војводите од Сасекс.
