На денешен ден, 25 мај, во Социјалистичка Федеративна Република Југославија составена од шест републики: Македонија, Србија, Словенија, Хрватска, Босна и Херцеговина и Црна Гора, се славеше Денот на младоста.
Пејачката Неда Украден се присети на тоа време и на Денот на младоста, кога низ поранешната држава се организираа прослави. Во разговор за српските медиуми зборуваше и за распадот на Југославија, но, како што вели, спомените на убавите времиња и понатаму живеат во нејзината музика.
„Југославија е земјата во која сум родена, во која пораснав и во која живеевме околу 40 години среќно, во смисла на некаква сигурност. Освен тоа, нашиот пасош и самото тоа што бевме Југословени предизвикуваше почит во сите околни земји. Мојата прва помисла и сеќавање на Југославија е дека тоа беше земја без граници. Пазар со повеќе од 20 милиони луѓе. Продажбата на плочи, касети, посетеноста на концертите, популарноста – сето тоа беше навистина немерливо во споредба со денешното време… Но Југославија ќе ја паметам и по начинот на кој се распадна, по тие трагични и болни моменти по кои многумина жители на тогашната држава ја паметат. Изгледа дека тоа била некоја лоша легура кога се распадна. Но, секако, тоа беше време на младост, студии, школување, патувања, на што човек секогаш се сеќава со носталгија“, се присети Неда Украден.
Пејачката потоа зборуваше за учеството на бројни фестивали, како во Југославија, така и во дијаспората, каде што стекнувала слава и популарност. Сите фотографии и снимки од тоа време одамна не се кај неа.
„Сето тоа ми остана во Сараево. Целата моја биографија, библиографија, сѐ. Снимки, фотографии, аудиоснимки и VHS-касети. Сѐ заврши во ѓубре. Но спомените остануваат. Нив ги овековечив во мојата автобиографија „Зора је сванула“, бидејќи пишував токму за тоа. Тоа е нешто со кое многу се гордеам, а малкумина знаат за тоа. Сѐ помалку има луѓе што воопшто се сеќаваат на тоа време и кои како сведоци можат да напишат и кажат нешто за него.“, рече Неда за српски Курир.
