Здравствената состојба на поранешниот италијански премиер Силвио Берлускони, кој пред три недели беше примен во болница поради белодробна инфекција предизвикана од хронична леукемија, е подобрена, соопштија денеска неговите лекари.
„Во текот на изминатите четири дена, одговорот на третманот овозможи да се постигне стабилна клиничка состојба која се карактеризира со оптимално и убедливо обновување на функциите на органите“, се наведува во медицинскиот билтен, пренесува „Ројтерс“.
Тој беше пуштен од одделот за интензивна нега на 16 април.
Берлускони имаше низа здравствени проблеми во последниве години. Со години имаше пејсмејкер, имаше операција на срцето во 2016 година и го победи ракот на простата. Во 2020 година прележа и ковид.
Партијата Форца Италија на Берлускони е дел од десничарската коалиција на актуелната премиерка Џорџа Мелони, иако поранешниот премиер нема улога во италијанската влада.
