Лејди Гага на социјалните мрежи ѝ оддаде почит на колешката Бритни Спирс, по повод вчерашното завршување на старателството што 13 години го контролираше нејзиниот живот.
Еден ден откако судијката Бренда Пени пресуди во корист на Бритни да ја врати контролата врз нејзините финансии, личниот живот и медицинските одлуки, Лејди Гага објави фотографија со Спирс на нејзиниот инстаграм-профил.
На фотографијата од доделувањето на МТВ-наградите во 2011 година, Гага, маскирана во маж, ја бакнува Бритни во образ.
– Ја сакав Бритни Спирс целата нејзина кариера. Се угледував на неа, се восхитував на нејзината сила – таа охрабри толку многу луѓе и сè уште го прави тоа. Денес не можам да бидам посреќна поради тебе. Никогаш не го заслужи тоа што ти се случи, фала му на Бога за денес. Ти си суперѕвезда и супер човечко суштество. Те сакам – гласи емотивниот опис на фотографијата на Лејди Гага.
