Изборот за Мис Универзум, со традиција од 70 години, собира натпреварувачки од повеќе од 90 земји и се смета за најпрестижен натпревар за убавина во светот. Со проценета публика од повеќе од 500 милиони гледачи годишно, победата на ова натпреварување е билет за светот на славата и отвора врата кон бројни можности, каде што од натпреварувачките не се бара само убавина, туку и интелигенција и посветеност на општествено корисни проекти.
Иако точните износи за оваа година не се потврдени, Марка минатата година објави дека годишната плата на Мис Универзум изнесува 250.000 долари. За возврат, новата кралица на убавината работи со полно работно време, а нејзиниот густ распоред е исполнет со патувања, хуманитарни настани и медиумски настапи за подигање на свеста за важни општествени прашања.
Во текот на своето едногодишно владеење, победничката живее во луксузен стан, а организацијата ги покрива сите нејзини трошоци – од храна и облека до превоз, што често вклучува патување со приватен авион до настани низ целиот свет. Покрај тоа, таа добива и едногодишна залиха од козметички производи, пристап до врвни стилисти и бројни подароци од спонзори. Вредноста на сето ова, заедно со годишната плата, се проценува на околу 450.000 долари.
Еден од најпрепознатливите симболи на победата е луксузната круна. Во 2023 година, беше изработена нова круна, наречена Светлина на бесконечноста (Light of Infinity,), дело на француско-филипинскиот бренд „Jewelmer“. Таа е украсена со бисери од Јужното Море и дијаманти, а иако точната цена не е откриена, се проценува дека вреди околу 5 милиони долари. Круната не останува во посед на мисиацата, туку во текот на годината се појавува со неа на настани и одработува јавни настапи.
Покрај материјалните награди, титулата Мис Универзум носи и глобална слава и отвора врата за кариера во светот на модата, глумата или социјалниот активизам. Во текот на годината на мандат, победничките се среќаваат со влијателни луѓе од различни индустрии, присуствуваат на ексклузивни настани како што се модни ревии и филмски премиери и стекнуваат непроценливо искуство во јавните настапи.
Новата сопственичка на организацијата, Ан Јакапонг Јакрајутатип, ја истакна визијата на брендот како платформа за јакнење на жените.
– Нашата нова амбиција е да всадиме чувство на страст за „трансформативно лидерство“ кај сите нас, со цврсто верување дека секој може да води кон успех и да ги постигне своите животни цели – рекла Јакрајутатип, нагласувајќи ја посветеноста на социјалната инклузија, родовата еднаквост и одржливоста.
Оваа година беа воведени и специјални награди „Надвор од круната“, чии победнички ќе добијат финансиски поддршки за проекти со социјално влијание, додека земјата што ќе ја освои титулата „Најубави луѓе“ ќе обезбеди дури 50.000 долари за својата национална организација за Мис Универзум.
