Холандскиот претставник на овогодинешната Евровизија, Јост Клајн, кој беше дисквалификуван од натпреварувањето на денот на финалето, најверојатно ќе се соочи со обвиненија, соопшти шведската полиција, пренесува Евроњуз.
Во драматичен потег неколку часа пред големото финале, Клајн беше дисквалификуван поради, како што беше опишано, „инцидент“. Европската радиодифузна унија (ЕБУ) објави дека 26-годишниот натпреварувач, инаку еден од фаворитите, ќе биде под истрага и нема да може да настапи.
🚨Official: Joost Klein will not compete in the Eurovision Song Contest.
The grand final will feature only 25 countries. pic.twitter.com/CZ58PlduT3
— Eurovision News (@EurovisionNewZ) May 11, 2024
Подоцна беше потврдено дека член на продукциската екипа на Евровизија поднел обвинение против Клајн поради инцидентот.
„Очекуваме дека веројатно ќе има кривично гонење“, изјави Емил Андерсон, началникот на полицијата за шведската телевизија СВТ. Појаснето е дека процесот ќе биде „забрзано кривично гонење“.
„Сидсвенска дејли“, локален весник на Малме, градот каде што се одржа Евровизија, истакна дека вакви кривични дела често водат до парични казни по пресудата.
Освен оваа последна изјава, нема многу информации за што точно е обвинет Клајн.
