Омлет е јадење направено од матени јајца кои се полнат со разни состојки и се пржат во масло или путер. Се верува дека првите омлети биле направени во античка Персија, додека францускиот збор омлет започнал да се користи во средината на 16 век.
Денес, постојат многу верзии на омлет низ целиот свет, збогатени со зеленчук, сирење, месо, билки или зачини. Во Франција, омлетите се готват полека, со многу внимание и посветеност и обично се зачинети со билки, кромид и домати. Во Иран постои куку-омлет со билки и големи количини на други состојки.
Во Италија постои фритата, во Јапонија-тамагојаки, во Шпанија има тортиља де патата(што е вусшност омлет со компири), а во Соединетите држави има омлети од Денвер и Хангтаун Фрај. Ова јадење базирано на јајца може да се најде и во Кина, Индија, Индонезија, Кореја, Филипините и Тајланд.
Овој појадок е толку популарен што во 2012 година, жителите на Сантарем, Португалија го направија најголемиот омлет во светот за кој беа потребни 145.000 јајца.
