По десет распродадени концерти во белградскиот Сава Центар оваа пролет, Јозиновиќ го најави и најголемиот самостоен концерт во својата кариера во Србија. Пејачот на 24 октомври ќе настапи во Белградска арена, а билетите беа распродадени во рекорден рок, пренесува „Мондо“.
Продажбата на билети започнала во понеделник напладне, за концерт со сцена поставена во формат „Арена 360°“. Во еден момент во редот за чекање имало речиси 44 илјади луѓе, додека капацитетот на салата е околу 19 илјади места. Огромниот интерес на публиката довел до тоа целата арена да биде распродадена за само неколку часа.
Јаков на Инстаграм објави:
„Белградска арена распродадена за неколку часа!!! Хахахахах, што е ова? Прекрасни сте луѓе! Заедно ја создаваме најубавата приказна и едвај чекам да запеам со вас мојот нов албум. БЛАГОДАРАМ“
Многу обожаватели останале без билети, па веќе се шпекулира дека неговиот тим наскоро би можел да објави и втор датум за концерт. Веста за големиот настап пејачот ја споделил со публиката за време на емотивниот последен концерт во Сава центарот.
Јозиновиќ за порталот „Мондо“ открил и колку му значи поддршката од семејството за време на настапите. Тој рекол дека неговото семејство било во ложите на речиси половина од концертите во Сава центарот и дека секогаш се покрај него.
На прашањето зошто не седат во првите редови, тој одговорил: „Ги чувам за да можат на мир да уживаат, никој да не ги фотографира и да останат свои. Мислам дека јас сум тој што треба да биде пред камерите, а нив сакам да ги поштедам од тоа.“
