Најстарата ќерка на Доналд Трамп, Иванка, изјави дека повеќе нема да учествува во американската политика и нема да игра улога во претседателската кампања на нејзиниот татко во 2024 година, пишува Њујорк Пост.
„Многу го сакам татко ми. Овој пат решив да им дадам приоритет на моите мали деца и семејниот живот. Не планирам да се занимавам со политика“, рече Иванка Трамп (41).
Таа истакна дека секогаш ќе го поддржува својот татко надвор од „политичката арена“.
„Благодарна сум за привилегијата да му служам на американскиот народ и секогаш ќе бидам горда на многуте достигнувања на нашата администрација“, рече ќерката на Доналд Трамп.
Доналд Трамп, на свадбата на ќерката Тифани за време на викендот, се обидел да ги убеди Иванка Трамп и нејзиниот сопруг Џаред Кушнер да му се придружат во претседателската трка и да формираат обединет семеен фронт, велат изворите.
