Поранешната светска тениска ѕвезда Јелена Докиќ деновиве престојува во Македонија, а својата посета на Скопје ја овековечи со серија фотографии и кратка порака упатена до градот.
„Скопје, убаво си!“, напиша Докиќ на Инстаграм, каде што сподели моменти од прошетката низ македонската престолнина.
View this post on Instagram
Заедно со својот партнер, таа ги посети едни од најпознатите туристички атракции – кањонот Матка, Старата скопска чаршија, плоштадот „Македонија“ и црквата Свети Константин и Елена. На фотографиите може да се види дека двојката ужива во разгледувањето на градот и неговите знаменитости.
Ова не е единствената дестинација што Докиќ ја посети за време на престојот во земјава. Неколку дена претходно таа објави фотографија од појадок со ѓеврек и јогурт, а според објавата, дел од одморот го минала и во Охрид.
Нејзините следбеници брзо ја преплавија објавата со коментари, посакувајќи ѝ пријатен престој и истакнувајќи дека Македонија има уште многу места што вреди да се посетат.
Јелена Докиќ остави длабока трага во светскиот тенис. Во текот на кариерата се искачи до четвртото место на ВТА-листата и освои шест титули во сингл конкуренција. По повлекувањето од активното играње, таа стана телевизиски коментатор и автор, а со својата автобиографија отворено проговори за семејното насилство и предизвиците со кои се соочувала во текот на спортската кариера.
