Македонија ќе има своја претставничка на изборот за Мис на светот 2026, а честа годинава ѝ припадна на дваесетгодишната Ева Величковска, која ќе се натпреварува на еден од најпрестижните светски избори за убавина, што ќе се одржи во Виетнам.
Веста ја соопштија од организацијата „Мис Македонија“, која ја поседува лиценцата за националниот избор. Заедно со фотографија од Величковска во елегантен црвен фустан, ѝ посакаа успешна подготовка и достојно претставување на Македонија.
„Патот до Мис на светот 2026 започнува! Со гордост ја најавуваме нашата претставничка, Ева Величковска, која ќе ја претставува Македонија на најпрестижниот светски избор за убавина – Мис на светот 2026, што ќе се одржи во Виетнам. Ти посакуваме успех, инспиративно патување и блескав настап на светската сцена!“, порачаа од организацијата.
View this post on Instagram
Величковска има 20 години и студира на Славјанскиот универзитет во Скопје. Таа ќе ја наследи минатогодишната претставничка Чарна Невзати, која со својот настап остави позитивен впечаток на меѓународната сцена.
Објавата за новата македонска мисица предизвика бројни реакции на социјалните мрежи. Следбениците ѝ упатија честитки и пораки со поддршка, посакувајќи ѝ успешен настап на светскиот избор.
