Никола Карабатиќ и неговата долгогодишна избраничка Жералдин Пиле официјално го кажаа судбоносното „да“ по 15 години љубовна врска.
Прославениот ракометар радосната вест ја сподели со своите следбеници на Инстаграм, каде објави фотографии од свадбената церемонија.
„Господин и госпоѓа Карабатиќ“, кратко напиша тој.
Двојката е заедно од 2011 година, а, според француските медиуми, ги запознал заеднички пријател. Жералдин со години му е најголема поддршка и често беше присутна на неговите најважни натпревари.
Карабатиќ во повеќе интервјуа зборуваше со многу емоции за својата сопруга, нарекувајќи ја „најдобрата жена на светот“.
Тие се родители на две деца – синот Алек и ќерката Нора, а ракометарот често истакнува дека семејството секогаш му било приоритет.
Никола е роден во Ниш, а уште на четиригодишна возраст се преселил во Франција со своето семејство. Неговиот татко Бранко потекнувал од Трогир, додека мајка му Радмила е Србинка.
„И Србин сум и Хрват. Горд сум на моите корени. Франција е мојот дом, но драго ми е што потекнувам од поранешна Југославија“, изјавил Карабатиќ во едно интервју.
