Таму каде што е Теди Москов, едноставно не може да биде здодевно. Со многу смеа, мини-скици и емотивни сеќавања кои звучат како да се случиле вчера, помина премиерата на книгата „Теди Москов – некои можат, други не“, напишана од познатиот театарски критичар Димитар Стајков. Настанот во софискиот книжевен центар привлече голем број обожаватели на „вечниот импровизатор“ на бугарскиот театар, пишува „Хот Арена“.
Иако креаторот на култната телевизиска емисија „Улицата“ сè уште користи бастун поради последиците од тешката сообраќајна несреќа што ја доживеа во Германија пред неколку години, неговиот дух и духовитост се посилни од кога било. Наследникот на познатото семејство Москови, кое на Бугарија ѝ даде истакнати лекари, уметници и политичари, со својот хумор ја прошета публиката од детските денови на островот Света Анастасија, па сè до Капри и Соренто во неговата сакана Италија.
Најинтересниот момент на вечерта се случи кога еден од присутните читатели го праша режисерот: „Ако оваа книга некогаш биде поставена на сцена, кој актер би сакале да ве игра?“
Москов без двоумење и како од топ одговори:
„Азис!“
„Би го избрал него затоа што ќе напише нови реплики, а ќе направи и одлична музика. Па, и ќе го промени полот. Но, да не се шегуваме повеќе со него, бидејќи неколку пати ми има речено да одам да се бањам. Но, по одредена возраст, штетно е човек да се бања, епидермисот паѓа! Сепак, ветувам, за следната книга – ќе се искапам“, во свој стил прокоментира Теди Москов, предизвикувајќи аплаузи и смеа во салата.
