Денес уживавме во дворот на Соња Лазаревска, во скопската населба Ченто, со импресивна големина – илјада квадратни метри. Се разбира, импресивни се и цвеќињата и растенијата негувани од оваа цветна дама, која очигледно, обрнува внимание на секој детал, до перфекција. И тоа не е необично, доколку знаеме дека Соња е уметница.
Соња завршила средно уметничко училиште, отсек вајарство. Таа е скулпторка, но вработена е во дом за стари лица, кој вели дека го поддржува. Во слободно време пак, се занимава со цртање.
– Со одгледување на цвеќиња се занимавам веќе четири години. За уредување на дворот во мојот дом сум одговорна јас, моите родители и моите ќерки, заедно со сопругот – ни објаснува нашата уметница.
Во дворот доминираат кактусите и секулентите, а од цвеќиња тука се прекрасните сардели, обетчиња, бунгенвилии, бегонии, стелиција, клематис, хортензија…
Дворот е опркужен со многу дрвја, меѓу кои има најмногу елки. Па, можете да замислите каква магија се случува тука за време на новогодишните и божиќните празници, кога ќе падне и малку снекче.
– За нега на моите цвеќиња одвојувам секојдневно два до три часа – вели Соња.
Ни открива дека нејзино омилено цвеќе е бунгевилијата или народски – богумилија, зашто самото име кажува дека и на бог му е мила, но исто така и кактусите ги обожава, бидејќи нивниот цвет е многу нежен и преубав.
Во текот на зимата, Соња ги згрижува своите убавици на собна температура.
Ја прашување за совет за сите оние кои сакаат да почнат да се бават со нега на цвеќе и растенија, а таа ни одговара:
Мојот совет е првенствено да ги сакаат цвеќињата и да им посветат внимание, љубов, грижа. За почеток на купување и одгледување цвеќе, советувам да се започне со нешто поедноставно и полесно за одржување, како на пример кактуси и секуленти, или зависно во кое годишно време купувате цвеќе.
Инаку, Соња е членка на Фејсбук групата …ДВОРЧЕТО…, група која ви ја препорачуваме да си станете член и да се изнагледате преубави објави!
УЖИВАЈТЕ ВО ФОТОГАЛЕРИЈАТА:
ФОТО – ПРИВАТНА АРХИВА
