Спектакуларната церемонија на отворање на Олимписките игри се одржа во петокот вечерта во Париз, но еден настап особено го привлече вниманието на јавноста и тоа главно негативно.
Многумина беа воодушевени од отворањето, но подеднакво – многумина ова отворање го оценија како најлошо досега, а особено еден сегмент предизвика незадоволство.
Имено, на еден од мостовите на Сена беше прикажана „Тајната вечера“ на Да Винчи, но наместо апостолите и Исус, главни херои и хероини беа драг кралици, транс мажи и жени, како и други од т.н. „категорија чадор“. Инаку, овој мурал датира од времето на ренесансата, а се наоѓа во Милано, во црквата Санта Марија де ла Грација.
Свое мислење за овој настан даде и Анастасија Ражнатовиќ. Таа прво ја сподели „стори“ објавата на писателот Срѓан Зиројевиќ.
– Олимписките игри почнаа, но не славно. Нив ги отвори раперот Снуп Дог. Сквернавење на Тајната вечера. Јавач без лице на блед коњ кој ја има библиската симболика на смрт и уништување а потоа доаѓа пекол. Дожд кој паѓаше без престан. Ни останаа спортистите кои и покрај се ќе се борат за единство, мир и пријателство. Симболиката што ја пренесуваат спортистите е дека постојано се трудат да ги поместат своите граници и да станат подобри, а тоа е порака и за нас – напиша Срѓан, а Анастасија ја сподели неговата објава.
Пејачката потоа објави снимка со која споредува како се отвориле Олимписките игри во 1992 година, кога олимпискиот оган се палел со лак и стрела, а сега кога фокусот е на драг- кралиците, транс мажите и жените.
„Што е ова луѓе мои? Потсмевање на Бог? Срамота. Боже прости им, не знаат што прават“, напиша Анастасија.
