Иако една авиокомпанија му понудила износ од 35 милиони долари за снимање рекламна кампања за нив, што би траело само еден ден, холивудскиот глумец Џорџ Клуни не се согласил на тоа.
Откако ѝ ја кажал понудата на својата сопруга Амал, таа го советувала да не го прави тоа откако утврдила дека компанијата која сака да го ангажира е поврзана со „сомнителна“ држава.
„Да, ми понудија 35 милиони долари за еднодневна работа. Требаше да снимам реклама за авиокомпанија, но по разговорот со Амал, одлучивме дека сето тоа не е вредно за тие пари. Сѐ беше поврзано со една земј, која иако е сојузник, повремено е под прашалник по своите одлуки. Си помислив: Па, ако ми одзема и една минута сон, не вреди“, рекол Клуни во интервју за „Гардијан“.
За која земја се работи не сакал да прецизира, но со оглед на тоа што Амал Клуни работи како адвокатка за човекови права и која е специјализирана за интернационално право, сигурно била добро упатена во тие односи.
