Во интервју за емисијата „Andrew Marr Show“ на Би-Би-Си, американскиот актер Џорџ Клуни зборуваше за американскиот претседател Џо Бајден, за неговиот претходник Доналд Трамп и преостанатите планови и амбиции во кариерата. Актерот, ја отфрли можноста да влезе во политиката.
На прашањето дали некогаш би се вклучил во светот на политиката, Џорџ рече: „Не, бидејќи всушност би сакал да имам убав живот. Оваа година наполнив 60 години и разговарав со својата сопруга и ние работевме многу, како што сè уште работиме, и реков дека треба да размислуваме веќе за мирни години“.
„Ако сме здрави, како што сме сега… Имам 60 години и сè уште можам да играм кошарка и да ги правам работите што ги сакам. Но, за 20 години ќе наполнам 80 години и тоа е значајна бројка. Без разлика колку вежбате, што јадете, имате 80 години и затоа реков дека треба да се погрижиме да уживаме и да ги проживееме овие години на најдобар можен начин“.
Клуни вели дека ќе се обиде да го намали обемот на работа.
„Наместо три работи годишно, ќе работам една“, рече тој.
