По минатогодишната бременост и уживањето во мајчинските денови, кога на свет дојде нејзината ќерка Арија, Александра Пријовиќ повторно застана пред својата публика – и тоа во голем стил.
Музичката ѕвезда за рекордно кратко време одржа три концерти, а кога ќе се сумира сè, во Бар, Загреб и Белград ја слушале повеќе од 50.000 луѓе. Меѓу настапите, Пријовиќ даде кратко интервју во кое искрено проговори за семејната атмосфера во нејзиниот дом.
„Филип го избра името, а мене многу ми се допадна. Аки ја прифати прекрасно – внимателен е, грижлив кон неа. Навистина сум среќна, затоа што ми велеа дека знае да биде тешко кога ќе дојде второ дете, но тој е навистина добар и нежен кон неа“, откри Александра.
Пејачката не крие дека и сопругот Филип е целосно вклучен во грижата за наследничката, а без проблем се снаоѓа и со секојдневните обврски.
„Со Аки го правеше истото, го прави и сега – така што, нема никаков проблем“, изјави таа за „Ин магазин“.
Александра неодамна откри и помалку убав момент од периодот кога дознала дека е бремена – разочарувањето од луѓето околу неа.
„Кога дознав дека сум бремена, 95 отсто од луѓето ме заборавија. Бев многу тажна. Додека имаше сè, сите беа тука, а потоа ми беше навистина тешко“, признава пејачката.
Таа додаде дека разговарала и со свои постари колеги, кои ѝ потврдиле дека тоа е дел од животот.
„Ми рекоа дека истото им се случувало и ним – дека тоа едноставно се случува. Но, по сè убаво, во моментот кога требаше да бидам најсреќна во животот, јас не бев“, искрено заклучи Пријовиќ.
