Таткото на војвотката Меган Маркл, Томас Маркл, денеска изјави дека неговата ќерка и нејзиниот сопруг, принцот Хари, ја повредиле кралицата Елизабета Втора, со тоа што одеднаш одлучиле да се повлечат од високите кралски должности.
– Засрамен сум, жал ми е за кралицата – изјавил Томас Маркл во утринското телевизискио шоу „Добро Утро, Британија“.
Тој додаде дека не разбира зошто Хари и Меган толку брзо решиле да ги напуштат кралските должности.
– Нивната одлука е многу збунувачка и не верувам дека некој може да разбере како и зошто се случи тоа. Ваков раздор може да предизвика уште поголеми проблеми – рече Маркл.
Томас Маркл, кој не присуствуваше на свадбата на Хари и Меган, рече дека и натаму ја сака својата ќерка и е разочаран што толку се оддалечиле.
– Навистина ми недостасува ќерка ми – рекол тој.
Сепак, вели дека е подготвен да излезе на суд со својата ќерка во процесот во кој Меган го тужеше весникот „Мејл он сандеј“.
– Ако дојде до тоа да се сретнеме во судница, тоа би било супер, конечно ќе ги видам – истакнува Маркл, кој додал дека досега не го запознал ниту Хари, ниту неговиот внук.
Томас Маркл исто така вели дека Хари требало да го посети и да ја побара раката на неговата ќерка.
