По смртта на Владо Јаневски, од него со емотивна порака се прости и неговата долгогодишна пријателка Фросина Фро.
Таа на социјалните мрежи објави нивна заедничка фотографија, направена, како што напиша, во март годинава, и откри дека повеќе од 17 години биле блиски пријатели.
„Мојата последна слика со тебе, негде во март годинава, тајно моја отровна. Мојот пријател на кој со саати на телефон му раскажував сè што ме мачи, сè што ме радува…“, започнува нејзината објава.
Фросина откри дека иако живееле во различни градови, секојдневно биле во контакт, заедно вежбале, разговарале за книги и си биле поддршка во тешките моменти.
Во објавата напиша и дека последен пат го видела во болница пред една недела.
„Те видов последно во болница пред една недела, но ќе те гледам секој ден во моите мисли, во душава, додека собира снага да те преживее“, напиша таа.
На крајот од емотивното простување, Фросина порача дека Владо Јаневски засекогаш ќе остане дел од нејзиниот живот.
„Ти си мојот евергрин, мојата религија, дел од мојата животна приказна последниве 17 години си ти. И ти секогаш си сега. Никогаш нема да си минато… И знам, некогаш и негде, ќе те сретнам пак… И знам дека што и да е ќе помине. Но ти нема никогаш да ми поминеш“, напиша Фросина Фро.
