Музичкото реално шоу „Операција триумф“, кое во 2008 година го следеше целиот регион, беше вистински феномен што преку ноќ создаде нови ѕвезди. Младите таленти ја освоија публиката со својот глас и харизма, но по завршувањето на шоуто, многумина од нив исчезнаа од јавната сцена, а нивните животни патишта тргнаа во неочекувани правци.
Иако за време на натпреварот уживаа огромна популарност, славата за дел од нив траеше кратко. Наместо блескави кариери, некои се соочија со сериозни животни предизвици, лични трагедии и борби кои ретко излегуваат на површина.
Победникот Аднан Бабајиќ по шоуто замина во САД, каде и денес живее. Иако долго време беше надвор од очите на јавноста, неодамна најави враќање на музичката сцена. Во меѓувреме, тој преживеа и сообраќајна несреќа, за среќа без сериозни последици.
За време на престојот во куќата на шоуто, Данијел Павловиќ доживеал лична загуба – му почина дедото, а слична судбина го снајде и Ѓорѓе Гогов веднаш по завршувањето на натпреварот.
Павловиќ, кој стигна до финалето и изгради солидна кариера по шоуто, денес повеќе не настапува активно, но остана поврзан со музиката преку пишување песни и држење часови по пеење.
Една од најконтроверзните приказни е онаа на Милица Мајсторовиќ, која по шоуто се најде во центарот на медиумското внимание поради сериозни лични кризи. Таа во 2010 година заврши во болница по интоксикација, а подоцна отворено зборуваше за својата психичка состојба и борбата низ која поминала. И покрај тешкиот период, Мајсторовиќ подоцна се насочи кон глумата и настапува во театарски претстави.
Шок за јавноста беше и искрената исповед на Вукашин Брајовиќ, кој призна дека се борел со депресија и дека се обидел да си го одземе животот. Тој зборуваше за „високофункционална депресија“ која долго време не била забележлива за околината, истакнувајќи колку е важно менталното здравје да не се игнорира.
Од друга страна, Никола Сариќ Сајко, кој беше миленик на публиката, постепено се повлече од музиката и целосно исчезна од јавниот живот. Иако имаше голем број обожаватели, тој не ја продолжи естрадната кариера.
