Македонската пејачка Тамара Тодевска јавно ги осуди изјавите на политичарот Петар Богојески за жените, феминизмот и семејните односи. Во својата реакција на социјалните мрежи, таа упати критики и кон медиумите што им даваат простор на ставови со кои се оправдува насилството врз жените.
Повод за нејзиното огласување беше гостувањето на Богојески во емисијата „Под лупа“ на телевизија Алфа. Во дебатата за семејните односи и насилството, тој изјави дека феминизмот ги поттикнал жените да го отфрлат „машкиот надзор“. На прашањето кој треба да го спроведува таквиот надзор, Богојески го посочи сопругот.
Изјавите предизвикаа реакции во јавноста, а Тодевска порача дека говорот што ги понижува жените не смее да се прифаќа како вообичаен дел од јавната комуникација.
„Говорот на омраза, а особено омразата кон жените, мора итно да престане во јавниот простор!“, нагласи пејачката.
Таа го отвори и прашањето за одговорноста на медиумите. Според Тодевска, настојувањето да се привлечат што повеќе прегледи и кликови не може да биде оправдување за некритичко ширење проблематични ставови.
Тодевска откри и лично искуство со телевизијата Алфа
Во својата објава, пејачката се осврна и на претходно гостување во истата телевизија. Таа тврди дека снимила емисија што никогаш не била емитувана, бидејќи, според образложението што го добила, не била доволно подобна, ниту „доволно Македонка“.
Со ова тврдење, Тодевска дополнително го отвори прашањето за уредувачките критериуми при изборот на гости и содржини што добиваат телевизиски простор.
Пејачката смета дека премолчувањето на дискриминаторските изјави може да придонесе за нивно повторување.
„Молкот денеска само отвора простор за нови напади и дополнително ја храни омразата кон секоја една и секој еден од нас“, напиша таа.
