Неколку месеци пред закажаниот концерт на Јелена Карлеуша во Скопје, на социјалните мрежи се појави онлајн петиција со која се бара нејзиниот настап да биде откажан.
Во петицијата, чии фотографии се споделуваат на интернет, се наведува дека причината за ваквото барање е тврдењето дека пејачката наводно промовира сатанизам и ги навредува верските чувства. Засега не е познато колку луѓе ја поддржале иницијативата, ниту дали таа има каков било формален ефект врз одржувањето на концертот.
Настапот на Карлеуша е закажан за 17 октомври во арената „Јане Сандански“ во Скопје.
Во меѓувреме, под објавите поврзани со петицијата се појавија бројни коментари од нејзини обожаватели, кои се спротивставуваат на идејата за забрана на концертот. Дел од нив оценуваат дека станува збор за неоснована иницијатива и сметаат дека концертот треба да се одржи според планираното.
Јелена Карлеуша засега јавно не се огласи по повод петицијата.
Инаку, ова не е првпат пејачката да се соочи со слични иницијативи. Во изминатите години беа покренати петиции против нејзини настапи во повеќе градови во регионот, меѓу кои Сараево, Крагуевац, Суботица, Кикинда и Сомбор. Во дел од случаите концертите беа реализирани и покрај противењето на дел од јавноста, додека во Сараево настапот беше откажан.
Карлеуша неодамна се врати на музичката сцена со три нови песни и спотови, кои се најдоа меѓу најслушаните на регионалните музички платформи.
