За време на пробите на 17-то издание на Јуниорскиот Евросонг, Мила ги крена на нозе сите присутни во Арената Гливице во Полска! Со извонредниот настап на „Fire“, на музика и текст на тандемот Лазар и Магдалена Цветковски, 14-годишната Мила Москов од Прилеп, буквално ја „разгоре“ атмосферата помеѓу сите присутни во Полска.
Миленик на публиката, но и на медиумите, заслужено го доби највисокото признание од страна на интернационалниот медиа портал Destination Eurovision – Сертфикат за најдобар евровизиски пакет според мислењето на читателите, коешто и беше врачено пред сите присутни учесници и медиуми низ директен ТВ пренос на националната полска телевизија.
Фановите и поддржувачите на Македонскиот претставник ширум светот, па и од нашата земја, се уште можат да гласаат на https://vote.junioreurovision.tv и да го дадат својот глас за Мила, со што ќе го дефинираат победникот на годинешниот јуниорски Евросонг во сооднос 50% од онлајн гласањето, додека пак останатите 50% ќе бидат обезбедени од работата на стручните жири комисии од секоја земја учесничка.
Без оглед на финалниот пласман во недела, Мила и целиот тим се исклучително задоволни од комплетниот производ во кој вложија многу труд и љубов во изминатите неколку месеци. Горди на сработеното, го очекуваат Големото финале на јуниорскиот Евросонг кое стартува денеска во 16 часот на програмите на Македонската радио телевизија.
