Тој е еден од нашите естрадни ѕвезди кои скоро да немаше ден да нема настап пред појавата на пандемијата.
„Најпрво беа забранети јавни настани и последно ќе биде дозволено пак јавни собири, затоа најдолго ќе се одрази на луѓето кои живеат од јавни настани“, вели Јоце Панов.
Но, затоа пак изолацијата е одлична можност да помине повеќе време со семејството, да ужива во новата улога на татко со новиот член Лука, кој има четири месеци. Подготвува и нешто ново на музички план. Еве како ги поминува деновите на изолација.
Дали новонастанатата ситуација за тебе е можност повеќе време да поминеш со семејството?
– Јас сум човек кој цел живот функционира надвор, дома сум само за спиење, така што оваа ситуација ме убива. Но, ете барем повеќе време поминувам дома, читам, работам на нови песни, свирам на клавир и гитара и некако поминува времето.
Какво бебе е Лука?
– Лука е супер, цела ноќ спие, не плаче навечер, ама затоа преку ден ретко заспива, а јас спијам до 11 – 12 часот.
Менуваш ли памперс и ѝпомагаш ли на сопругата за бањање?
– Хаха, веќе скоро 4 месеци е Лука, пробав 2 -3 пати да сменам памперс и не сум лош. А знам и да го бањам.
Кој филм би го препорачал да го гледаат читателите во време на изолација?
-„Џокер“, има многу добра порака.
Книга за читање додека сме дома?
– Јас повеќе преферирам книги за успех и мотивација, од новите автори го читам Робин Шарма.
Го користиш ли времето за нешто ново на музички план?
– После дуетот (машап) со Александра Матрикс, кој помина одлично низ цела екс-ју, снимив неколку кавери, „Данка“ е веќе на Јутјуб, за неколку дена ќе објавам уште една. Работам и на моја нова песна „Никоме не причам о нама“, која ќе излезе после оваа ситуација со корона.
Со која динамика беа свирките и од кога не си имал настап?
– Имав премногу настапи, особено околу Нова Година и празниците, но оваа ситуација нè погоди сите, а најмногу нас уметниците и угостителите кои зависиме од јавни собири, настапи, концерти, журки… Мислам дека ние сме први на удар, дека најмногу и најдолго ќе се одрази негативно кај нас музичарите и угостителите, затоа што 90% од нас живееме само од настапи и немаме други приходи. Најпрво беа забранети јавни настани, и последно ќе биде дозволено пак јавни собири, затоа најдолго ќе се одрази на луѓето кои живеат од јавни настани. Но, тоа е што е, како за сите, така и за нас.
Александра Велинова
