Српската пејачка Јелена Карлеуша и нејзиниот поранешен сопруг, фудбалерот Душко Тошиќ, ги здружија силите за еден од најважните денови во животот на нивната постара ќерка Атина. Таа на 7 септември ќе наполни 18 години, а истиот ден нејзината помлада сестра Ника ќе го прослави 17. роденден.
Иако Карлеуша и Тошиќ повеќе не се заедно, за родендените на своите ќерки подготвуваат голема заедничка прослава во еден од најлуксузните белградски хотели.
Според српските медиуми, на списокот се околу 200 гости – членови на семејството, пријатели, соработници, колеги на Карлеуша, како и училишни другари на Атина и Ника.
Главниот дел од организацијата го презела Карлеуша, додека Тошиќ е задолжен за финансиите. Се подготвуваат раскошна сценографија и декорација, а особено внимание е посветено на фустаните што ќе ги носат славеничките и нивната мајка. Станува збор за креации од висока мода, за чија изработка биле потребни многу часови рачна работа.
Посебно внимание е посветено и на храната. Менито ќе чини 150 евра по гостин и ќе вклучува специјалитети од домашната и интернационалната кујна, како и посебни вегетаријански јадења. За гостите ќе има француски шампањ и италијански вина, а се подготвуваат и повеќекатни роденденски торти.
На прославата се очекуваат и бројни познати личности од српската музичка сцена, а за музичкиот дел се погрижил Тошиќ, кој избрал бенд со репертоар од домашни и странски песни.
Карлеуша потврди дека двајцата родители се вклучени во подготовките и откри дека нивните ќерки немале посебни барања за прославата.
„Ќе биде многу убаво и бајковито. Убаво е што во целата приказна се и мама и тато. На Душко му останува само да плати“, се пошегува пејачката.
Таа додаде дека Атина и Ника не побарале ништо од родителите и ги опиша како многу скромни. Сепак, според изворите на српските медиуми, Карлеуша и Тошиќ веќе им подготвиле скапоцени роденденски подароци како изненадување.
