Македонската алпинистка Ирина Камилоска уште еднаш покажа дека љубовта кон планината е неизоставен дел од нејзиното секојдневие, а во авантурите во природа сега редовно друштво ѝ прават и нејзините две деца.
На најновите фотографии што ги сподели на Инстаграм, Камилоска планинари со тригодишниот Јосиф и едногодишната Лена.
Она што особено го привлече вниманието е начинот на кој мајката успева да ги носи и двајцата – Јосиф на грб, а малата Лена во кенгур на предната страна.
„Мајка и мајка природа“, напиша таа во описот на објавата.
Фотографиите предизвикаа бројни позитивни реакции, а следбениците ѝ упатија пофалби за нејзината издржливост, но и за тоа што уште од најрана возраст им ја пренесува љубовта кон природата и планината на своите деца.
„Браво, браво, сè повеќе да сме вакви“, напиша Елена Бубало во коментар под објавата.
Во еден од коментарите Камилоска откри дека носењето товар за време на планинарење за неа не е ништо невообичаено, бидејќи одамна е навикната на вакви предизвици. Овој пат нивната мала семејна авантура траела околу 45 минути, до блиско брдо.
Камилоска и претходно зборувала за желбата мајчинството да не значи откажување од планината. Во интервју за емисијата „Мамавизија“ на „Слободен печат“, таа раскажа дека се искачувала на Водно и за време на двете бремености, дури и во деветтиот месец, а со планинарење продолжила и откако ги родила децата.
Токму од нејзината желба да не планинари сама со бебе произлегла и иницијативата „Мајки на Водно“. Како што раскажа тогаш, на првичниот повик на Инстаграм ѝ се придружиле само две мајки, а подоцна групата пораснала на повеќе од 70 мајки со бебиња кои планинареле заедно.
Во истото интервју, Камилоска откри и дека со сопругот, пејачот Павле Камилоски, имаат желба нивното семејство во иднина да стане побројно. И двајцата потекнуваат од семејства со по три деца, а Ирина раскажа дека отсекогаш посакувала и самата да има три деца.
