Хрватската писателка, новинарка и колумнистка Ведрана Рудан почина на 76-годишна возраст, по долга и тешка борба со ракот. Тажната вест за хрватскиот портал „Шоубаз“ ја потврдиле извори блиски до неа.
Утрово на нејзиниот официјален профил беше објавена кратката порака: „Ведрана отиде на подрачје без сигнал“, а насловната фотографија беше заменета со фотографија со натпис „No Signal“ („Нема сигнал“).
Пораката се надоврзува на зборовите што Рудан претходно ги изговори во емисијата „Nedjeljom u dva“, кога отворено зборуваше за болеста и смртта.
„Сакам да кажам дека има многу луѓе кои ме сакаат и дека јас ги сакам нив. И дека сум бесмртна. Нека мојата смрт ја сфатат како одење на подрачје без сигнал“, рече тогаш таа.
Рудан во мај 2024 година јавно соопшти дека боледува од ретка форма на карцином на жолчните канали. За својата борба со болеста зборуваше отворено и директно, во препознатливиот стил што ја следеше во текот на нејзината долгогодишна кариера.
Ведрана Рудан е родена на 29 октомври 1949 година во Опатија. Беше една од најпрепознатливите и најпровокативни авторки во регионот, а нејзините дела се преведени на повеќе јазици, меѓу кои и на македонски.
