Долгоочекуваниот албум „Долазиш“ од хрватскиот пејач Оливер Драгојевиќ конечно го здогледа светлото на денот. Станува збор за издание со дванаесет досега необјавени песни, кои сигурно ќе ги воодушеват бројните обожаватели на легендарниот музичар. Албумот од денеска е достапен на сите музички платформи, а може да се набави и на цеде.
Најавен со сингловите „Не могу ти речи“ и „Вриме је“, албумот го носи и новиот насловен сингл „Долазиш“, како и уште девет песни кои зрачат со препознатливата музичка чувствителност на Оливер. Посебна магија му даваат и музичките соработки со Теди Спалато, Маријан Бан, хорот „Извор“, клапата „Шуфт“ и Едо Бралиќ.
„По ‘Кад ми доџеш ти’, се случи композицијата ‘Долазиш’, која Оливер ми ја отпеа како демо верзија уште во 2010 година. Среќен сум што ѝ се допадна на семејството Драгоевиќ и што по толку години излегува во јавност. Се надевам дека ‘Долазиш’ ќе допре до луѓето и ќе се слуша со љубов, исто како и останатите песни од овој албум“, изјави авторот на насловната песна, Винко Барчот.
За песната е снимен и видеоспот во режија на Тони Мијач.
„Спотот за ‘Долазиш’ е замислен како суптилна паралела или продолжение на претходниот спот за песната ‘Вриме је’. Во овој визуелен приказ, приказната се фокусира на машки лик кој, како што налага текстот, со копнеж го чека повторното поврзување со саканата личност – било во физичкиот, било во имагинарниот свет. Во видеото се појавуваат и сцени кои се надоврзуваат на претходниот спот, како асоцијација на некои од култните мотиви поврзани со Оливер. Со атмосферата и емоцијата во спотот се обидов да ја доловам истата мешавина од среќа и меланхолија што и песната ја буди кај мене“, вели Мијач.
„Оваа можност за мал визуелен придонес кон опусот на Оливер беше голем предизвик за мене – и поради моето огромно почитување кон Оливер и целиот музички тим зад проектот, и поради желбата мојот стил достојно да се вклопи во оваа посебна целина. Чудно, но и фасцинантно е да си дел од ваков аранжман, и секогаш ќе ми врви мислата низ глава: ‘Што ли би рекол Оливер за сето ова што го создадовме?’ Но, верувам дека создадовме убава серија видеа за веќе прекрасен музички материјал“, додаде тој.
Албумот „Долазиш“ ќе биде промовиран на 28 јули во Вела Лука, ден пред традиционалниот концерт „Траг у бескрају“, кој повторно ќе се одржи во чест на годишнината од смртта на Драгојевиќ.
