Кончита Вурст, победникот на Евровизија 2014 со песната „Rise Like a Phoenix“, денес изгледа речиси непрепознатливо во споредба со периодот кога ја освои Европа со својот впечатлив изглед и сценски настап.
Томас Нојвирт, кој настапуваше под сценското име Кончита Вурст, во последните месеци во јавноста се појавува во многу поумерено и елегантно издание. На неодамнешната средба со австрискиот претседател Александер ван дер Белен носеше темносин костум, црна маица и дискретно стилизирана фризура, далеку од долгата коса, драматичната шминка и гламурозните фустани по кои беше препознатлив.
Сепак, препознатливата брада и понатаму останува негов заштитен знак.
Кончита победи на Евровизија пред 12 години и ѝ донесе на Австрија организација на натпреварот во 2015 година. Оваа година, јубилејното 70. издание повторно се одржува во Виена, што е третпат Австрија да биде домаќин.
Нојвирт започна да настапува како Кончита уште во 2011 година, а неговиот специфичен изглед – комбинација од женствена облека, шминка и брада – стана симбол на слободата на изразување и различноста.
Во јануари годинава, Кончита објави дека се повлекува од „евровизискиот контекст“ и дека сака да се посвети на нови професионални проекти.
„Евровизија ми го обликуваше животот. Тоа беше мојата сцена, мојот дом и мојата отскочна даска.
Но, како уметник, промената е единствената константа“, напиша тој на социјалните мрежи.
Тој додаде дека врската со Евровизија секогаш ќе остане важен дел од неговата историја, но дека чувствува потреба да продолжи понатаму.
Извршниот продуцент на Евровизија 2026, Михаел Крен, изјави дека организаторите ја почитуваат неговата одлука.
„Придонесот на Кончита Вурст е важен дел од историјата на Евровизија во Австрија“, порача Крен.
Инаку, овогодишното издание на Евровизија е едно од најконтроверзните во последните години. Пет земји – Исланд, Ирска, Холандија, Словенија и Шпанија – решија да не учествуваат поради учеството на Израел и војната во Газа.
Три од нив – Шпанија, Ирска и Словенија – најавија дека нема ни да го пренесуваат натпреварот, што претставува најголем бојкот на Евровизија уште од 1970 година.
Минатата година, за време на настапот на израелската претставничка Јувал Рафаел со песната „New Day Will Rise“, двајца демонстранти се обидоа да го прекинат настапот.
