Пејачката Кристина Арнаудова сподели емотивна и симпатична приказна за својот син Максим, откривајќи дека неговата љубов кон трчањето започнала уште кога имал само три и пол години.
Арнаудова, која е во брак со Александар Петровски – Сајкал, ретко зборува за приватниот живот и за своите синови Максим и Матео, но овојпат на Инстаграм објави фото-споредба што разнежни многумина.
На првата фотографија, малиот Максим позира по својата прва трка од еден километар, која ја истрчал со поддршка од татко му. Во рацете држи пехар, а Кристина откри дека токму таа и Сајкал ги купувале наградите за да го мотивираат.
„Овде лево има 3,5 години. Првпат истрча трка со поддршка од татко му – 1 км. Немаше таква возрасна категорија, и секоја година му купувавме ние пехари за да се почувствува вреден и награден за трудот и желбата да трча. Секако, ова тогаш не го знаеше“, напиша таа.
Пејачката низ насмевка додаде и дека дома го викале „Форест“, алудирајќи на легендарниот лик Форест Гамп, познат по своето непрекинато трчање.
На втората фотографија, пак, Максим денес има 15 години и позира со медал околу вратот, откако успешно истрчал 10 километри на HalkEco, која викендов се одржа во Скопје.
За разлика од детските денови, овојпат тој добил официјална диплома и медал за својот успех – признание што, судејќи според фотографијата, гордо го носел.
